ਅੱਜ ਪਿੰਡ ਦੇ ਸਰਕਾਰੀ ਪ੍ਰਾਇਮਰੀ ਸਕੂਲ 'ਚ ਪ੍ਰਵਾਸੀਆਂ ਭਾਰਤੀਆਂ ਦੀ ਇੱਕ ਮੀਟਿੰਗ ਹੋਈ, ਜਿਸ 'ਚ ਸਕੂਲ ਦੇ ਕੰਮ ਦਾ ਜਾਇਜ਼ਾ ਲਿਆ ਗਿਆ। ਵਰਨਣਯੋਗ ਹੈ ਕਿ ਸਕੂਲ ਦੀ ਇਮਾਰਤ ਦੀ ਮੁੜਉਸਾਰੀ ਦਾ ਕੰਮ ਚੱਲ ਰਿਹਾ ਹੈ, ਜਿਸ ਲਈ ਪਹਿਲਾ ਪ੍ਰਵਾਸੀ ਭਾਰਤੀਆਂ ਵਲੋਂ ਇੱਕਠੀ ਕੀਤੀ 3 ਲੱਖ ਰੁਪਏ ਤੋਂ ਵੱਧ ਦੀ ਰਕਮ ਅਤੇ ਸੰਸਦ ਮੈਂਬਰ ਸੰਤੋਖ ਸਿੰਘ ਚੌਧਰੀ ਵਲੋਂ ਮਿਲੇ ਤਿੰਨ ਲੱਖ ਰੁਪਏ ਨਾਲ ਕੰਮ ਚੱਲ ਰਿਹਾ ਹੈ। ਇਸ ਰਕਮ ਨਾਲ ਤਿੰਨ ਕਮਰਿਆਂ ਦੀਆਂ ਛੱਤਾਂ ਬਦਲਣ ਦਾ ਕੰਮ ਆਰੰਭ ਕੀਤਾ ਗਿਆ ਸੀ। ਇਸ ਦੌਰਾਨ ਇੱਕ ਕਮਰੇ ਨੂੰ ਬਿਲਕੁੱਲ ਢਾਹ ਦਿੱਤਾ ਸੀ ਅਤੇ ਇਸ 'ਚ ਪਹਿਲਾ ਦੇ ਬਣੇ ਬਾਥਰੂਮ ਵਾਲਾ ਥਾਂ ਨਾਲ ਮਿਲਾ ਕੇ ਇੱਕ ਕਮਰਾ ਹੋਰ ਤਿਆਰ ਕਰ ਲਿਆ ਗਿਆ। ਇਸ ਤਰ੍ਹਾਂ ਹੁਣ ਚਾਰ ਕਮਰੇ ਤਿਆਰ ਹੋ ਜਾਣੇ ਹਨ। ਇਸ ਦੇ ਨਾਲ ਹੀ ਵਰਾਂਡਾ ਅਤੇ ਇਸ ਵਰਾਂਡੇ ਦੇ ਅੰਦਰ ਹੀ ਇੱਕ ਮਾਡਰਨ ਰੀਡਿੰਗ ਰੂਮ ਤਿਆਰ ਹੋ ਜਾਣਾ ਹੈ। ਇਨ੍ਹਾਂ ਪੈਸਿਆਂ ਨਾਲ ਸਧਾਰਨ ਕਿਸਮ ਦੀਆਂ ਫਰਸ਼ਾਂ ਦਾ ਕੰਮ ਤਾਂ ਹੋ ਸਕਦਾ ਹੈ ਪਰ ਇਸ ਦੀਆਂ ਫਰਸ਼ਾਂ ਮਾਰਬਲ ਆਦਿ ਦੀਆਂ ਬਣਾਉਣ ਦਾ ਵਿਚਾਰ ਹੈ ਅਤੇ ਪਹਿਲਾ ਵਾਲਾ ਬਾਥਰੂਮ ਢਾਹ ਕੇ ਦੂਜੇ ਥਾਂ 'ਤੇ ਇਸ ਨੂੰ ਬਣਾਉਣ ਦਾ ਵਿਚਾਰ ਹੈ।
ਕੰਮ ਦੇ ਦੂਜੇ ਪੜ੍ਹਾਅ ਵਜੋਂ ਇਸ ਕੰਮ ਲਈ 3 ਲੱਖ ਰੁਪਏ ਤੋਂ ਵੱਧ ਦੀ ਰਕਮ ਲੋੜੀਂਦੀ ਹੈ। ਅੱਜ ਦੀ ਮੀਟਿੰਗ ਤੋਂ ਕੁੱਝ ਦਿਨ ਪਹਿਲਾ ਪ੍ਰਵਾਸੀਆਂ ਭਾਰਤੀਆਂ ਵਲੋਂ ਇਸ ਕੰਮ ਲਈ ਮਦਦ ਦਾ ਐਲਾਨ ਕੀਤਾ ਗਿਆ ਸੀ। ਅੱਜ ਦੀ ਮੀਟਿੰਗ 'ਚ ਹੁਣ ਤੱਕ ਇਕੱਠੇ ਹੋਏ ਪੈਸਿਆਂ ਬਾਰੇ ਹਾਜ਼ਰੀਨ ਨੂੰ ਜਾਣਕਾਰੀ ਦਿੱਤੀ ਗਈ ਅਤੇ ਵਿਸ਼ਵਾਸ਼ ਦਵਾਇਆ ਗਿਆ ਇਸ ਰਕਮ ਨਾਲ ਦੂਜੇ ਹਿੱਸੇ ਦਾ ਕੰਮ ਮੁਕੰਮਲ ਹੋ ਜਾਵੇਗਾ। ਇਸ ਕੰਮ ਲਈ ਜਿਸ ਢੰਗ ਨਾਲ ਮਾਇਆ ਆ ਰਹੀ ਹੈ, ਉਸ ਨਾਲ ਇਹ ਵਿਸ਼ਵਾਸ਼ ਪੱਕਾ ਹੋ ਗਿਆ ਹੈ ਕਿ ਸਕੂਲ ਦਾ ਮੁਕੰਮਲ ਪ੍ਰੋਜੈਕਟ ਜਲਦੀ ਹੀ ਮੁਕੰਮਲ ਹੋ ਜਾਵੇਗਾ।
ਕੰਮ ਦੇ ਤੀਜੇ ਪ੍ਰੋਜੈਕਟ ਵਜੋਂ ਸਕੂਲ ਦਾ ਦਫ਼ਤਰ, ਲੋੜੀਂਦਾ ਫਰਨੀਚਰ, ਮਾਡਰਨ ਰਸੋਈ, ਡਾਈਨਿੰਗ ਰੂਮ, ਪਾਰਕ, ਝੂਲੇ, ਖੇਡਾਂ ਦਾ ਸਮਾਨ, ਕੰਪਿਊਟਰ, ਟੀਵੀ ਆਦਿ ਬਣਾਇਆ ਜਾਵੇਗਾ। ਜਿਸ ਢੰਗ ਨਾਲ ਪਹਿਲੇ ਅਤੇ ਦੂਜੇ ਪੜ੍ਹਾਅ ਲਈ ਮਦਦ ਆਈ ਹੈ, ਉਸ ਨਾਲ ਇਹ ਯਕੀਨ ਤਹਿਤ ਹੀ ਕਿਹਾ ਜਾ ਸਕਦਾ ਹੈ ਕਿ ਹੁਣ ਉਹ ਦਿਨ ਦੂਰ ਨਹੀਂ ਜਦੋਂ ਸਕੂਲ ਨੂੰ ਦੂਜੇ ਪਿੰਡਾਂ ਦੇ ਲੋਕ ਦੇਖਣ ਆਇਆ ਕਰਨਗੇ। ਇਸ ਮੌਕੇ ਸਮੂਹ ਪ੍ਰਵਾਸੀ ਭਾਰਤੀਆਂ ਦਾ ਵਿੱਤੀ ਮਦਦ ਲਈ ਪਿੰਡ ਦੇ ਸਰਪੰਚ ਕਾਂਤੀ ਮੋਹਣ ਅਤੇ ਸਰਬਜੀਤ ਗਿੱਲ ਨੇ ਧੰਨਵਾਦ ਕੀਤਾ।
- ਮੀਟਿੰਗ ਉਪਰੰਤ ਖਿੱਚੀ ਗਈ ਇੱਕ ਯਾਦਗਾਰੀ ਤਸਵੀਰ।
