ਮਹਿੰਮੀ ਜਠੇਰੇ ਭਵਨ ਵਿਖੇ ਸਲਾਨਾ ਮੇਲਾ ਧੂਮ ਧਾਮ ਨਾਲ ਮਨਾਇਆ

ਅੱਜ ਮਹਿੰਮੀ ਜਠੇਰੇ ਭਵਨ (ਰਜਿ.) ਮੁਠੱਡਾ ਕਲਾਂ ਵਿਖੇ ਹਜ਼ਾਰਾਂ ਸੰਗਤਾਂ ਦੀ ਹਾਜ਼ਰੀ ਵਿੱਚ ਸਲਾਨਾ ਮੇਲਾ ਅਯੋਜਿਤ ਕੀਤਾ ਗਿਆ। ਪ੍ਰਬੰਧਕ ਕਮੇਟੀ ਅਤੇ ਸੰਗਤਾਂ ਵਲੋਂ ਦਰਬਾਰ ਬਾਬਾ ਝੰਡੂ ਰਾਮ ਜੀ ਵਿਖੇ ਨਿਸ਼ਾਨ ਸਾਹਿਬ ਸਤਿਕਾਰ ਸਹਿਤ ਚੜ੍ਹਾਏ ਗਏ। ਸੰਗਤਾਂ ਨੇ ਦੇਸ਼ਾਂ ਵਿਦੇਸ਼ 'ਚੋਂ ਦਰਬਾਰ ਵਿਖੇ ਪੁੱਜ ਕੇ ਹਾਜ਼ਰੀ ਲਗਵਾਈ। ਪੰਜਾਬ ਦੇ ਨਾਮਵਰ ਕਲਾਕਾਰਾਂ ਦੇ ਧਾਰਮਿਕ ਪ੍ਰੋਗਰਾਮ ਪੇਸ਼ ਕਰਕੇ ਸੰਗਤਾਂ ਨੂੰ ਗੁਰੂ ਚਰਨਾਂ ਨਾਲ ਜੋੜੀ ਰੱਖਿਆ। ਦਰਬਾਰ ਵਿਖੇ ਸ. ਅਵਤਾਰ ਸਿੰਘ ਕਰੀਮਪੁਰੀ ਮੁਖ ਤੌਰ 'ਤੇ ਨਤਮਸਤਕ ਵੀ ਹੋਏ। ਉਨ੍ਹਾਂ ਨੇ ਦਰਬਾਰ ਲਈ ਜਿੱਤਣ ਉਪਰੰਤ ਹਰ ਸੰਭਵ ਕਾਰਜ ਕਰਨ ਦਾ ਵਚਨ ਕੀਤਾ। ਸਵੇਰ ਤੋਂ ਹੀ ਕਮੇਟੀ ਵਲੋਂ ਸੰਗਤਾਂ ਲਈ ਚਾਹ ਪਕੌੜੇ ਮਠਿਆਈ ਅਤੇ ਬਾਅਦ ਦੁਪਹਿਰ ਗੁਰੂ ਕੇ ਲੰਗਰ ਅਤੁੱਟ ਵਰਤਾਏ ਗਏ। ਇਸ ਮੌਕੇ ਮਹਿੰਮੀ ਜਠੇਰੇ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸ਼੍ਰੀ ਕਪੂਰ ਚੰਦ, ਸੋਮ ਲਾਲ ਮਹਿੰਮੀ, ਰਜਿੰਦਰ ਕੁਮਾਰ, ਪਿਆਰਾ ਰਾਮ ਨੰਬੜਦਾਰ, ਬਲਬੀਰ ਚੰਦ, ਰੇਸ਼ਮ ਲਾਲ ਬਿੱਲਾ, ਮੋਹਣ ਲਾਲ, ਤੇਜ ਲਾਲ, ਗਿਆਨ ਚੰਦ, ਤਰਸੇਮ ਲਾਲ, ਸੁਰਜੀਤ ਰਾਮ, ਹੁਸਨ ਲਾਲ, ਲਸ਼ਕਰੀ ਰਾਮ ਮਹਿੰਮੀ, ਮਹਿੰਦਰ ਪਾਲ ਮਹਿੰਮੀ, ਕੁਲਵਿੰਦਰ ਮਹਿੰਮੀ, ਪ੍ਰੇਮ ਪਾਲ ਗੁਰਾਇਆ, ਨਛੱਤਰ ਮਹਿੰਮੀ ਆਦਿ ਹਾਜ਼ਰ ਸਨ।

ਨਾਮਧਾਰੀ ਸਤਿਗੁਰੂ ਉਦੈ ਸਿੰਘ ਜੀ ਦਾ ਪਿੰਡ ਮੁਠੱਡਾ ਕਲਾਂ ਦਾ ਦੌਰਾ

ਅੱਜ ਨਾਮਧਾਰੀ ਸਤਿਗੁਰੂ ਉਦੈ ਸਿੰਘ ਜੀ ਨੇ ਪਿੰਡ ਮੁਠੱਡਾ ਕਲਾਂ 'ਚ ਉਸਾਰੀ ਅਧੀਨ ਨਾਮਧਾਰੀ ਧਰਮਸ਼ਾਲਾ ਦਾ ਉਚੇਚੇ ਤੌਰ 'ਤੇ ਨਿਰੀਖਣ ਕੀਤਾ। ਵਰਨਣਯੋਗ ਹੈ ਕਿ ਮੁਠੱਡਾ ਕਲਾਂ ਨੂੰ ਨਾਮਧਾਰੀ ਇਤਿਾਹਸ 'ਚ ਸਤਿਗੁਰੂ ਰਾਮ ਸਿੰਘ ਜੀ ਦੀ ਡਿਊਢੀ ਵਜੋਂ ਜਾਣਿਆ ਜਾਂਦਾ ਹੈ। ਉਨ੍ਹਾ ਨਾਮਧਾਰੀ ਧਰਮਸ਼ਾਲਾ ਦੇਖਣ ਉਪਰੰਤ ਪਿੰਡ 'ਚ ਕਈ ਘਰਾਂ 'ਚ ਵੀ ਦਰਸ਼ਨ ਦਿੱਤੇ। ਇਸ ਮੌਕੇ ਇਲਾਕੇ ਭਰ 'ਚ ਸੰਗਤਾਂ ਹੁੰਮ ਹੁਮਾ ਕੇ ਪੁੱਜਣੀਆਂ ਸ਼ੁਰੂ ਹੋ ਗਈਆ। ਸੰਗਤਾਂ 'ਚ ਕਾਫੀ ਉਤਸ਼ਾਹ ਸੀ। ਦਿਵਾਲੀ ਤੋਂ ਅਗਲੇ ਦਿਨ ਦੀ ਇਸ ਆਮਦ ਨੇ ਦਿਵਾਲੀ ਵਰਗਾ ਉਤਸ਼ਾਹਜਨਕ ਮਹੌਲ ਬਣਾ ਦਿੱਤਾ।

ਕਬੱਡੀ ਦੀ ਗਰਾਊਂਡ ਨੂੰ ਦੀਵਿਆਂ ਨਾਲ ਰੁਸ਼ਨਾਇਆ

ਦੀਵਾਲੀ ਦੀ ਰਾਤ ਪਿੰਡ ਮੁਠੱਡਾ ਕਲਾਂ 'ਚ ਕਬੱਡੀ ਖਿਡਾਰੀਆਂ ਅਤੇ ਖੇਡ ਪ੍ਰੇਮੀਆਂ ਨੇ ਕਬੱਡੀ ਦੀ ਗਰਾਊਂਡ ਦੀ ਦੀਪਮਾਲਾ ਕੀਤੀ। ਅਜਿਹਾ ਕਰਕੇ ਕਬੱਡੀ ਖਿਡਾਰੀਆਂ ਨੇ ਆਪਣੀ ਗਰਾਉਂਡ ਨਾਲ ਸਾਂਝ ਪਾ ਕੇ ਦੀਵਾਲੀ ਮਨਾਈ। ਇਸ ਦੀ ਅਗਵਾਈ ਜਸਬੀਰ ਸਿੰਘ, ਸ਼ਰਨਜੀਤ ਸਿੰਘ, ਹਰਪ੍ਰੀਤ ਸਿੰਘ, ਹਰਜਿੰਦਰ ਸਿੰਘ, ਅਮਨਦੀਪ ਸਿੰਘ, ਮੁਖਤਿਆਰ ਸਿੰਘ, ਹੀਮਾਂਸ਼ੂ ਸ਼ਰਮਾ, ਦੀਪ, ਅਰਵਿੰਦਰ ਸਿੰਘ, ਹਰਵਿੰਦਰ ਸਿੰਘ, ਸੂਰਜ, ਤਰਜਿੰਦਰ ਸਿੰਘ ਅਤੇ ਹਰਿੰਦਰ ਸਿੰਘ ਸਾਬੀ ਨੇ ਕੀਤੀ। ਇਸ ਮੌਕੇ ਕਰੀਬ 500 ਦੀਵਿਆਂ ਦੀ ਲੋਅ ਨਾਲ ਗਰਾਊਂਡ ਨੂੰ ਰੁਸ਼ਨਾ ਦਿੱਤਾ। ਇਸ ਉੱਦਮ ਲਈ ਨੌਜਵਾਨਾਂ ਨੇ ਕਾਫੀ ਉਤਸ਼ਾਹ ਦਿਖਾਇਆ।

ਪਿੰਡ ਦੇ ਪ੍ਰਾਇਮਰੀ ਸਕੂਲ ਦੀ ਸਥਿਤੀ ਅਤੇ ਭਵਿੱਖ

ਪਿੰਡ ਦੇ ਪ੍ਰਾਇਮਰੀ ਸਕੂਲ ਦੀ ਸਥਿਤੀ ਅਤੇ ਭਵਿੱਖ

ਪਿੰਡ ਦੇ ਪ੍ਰਾਇਮਰੀ ਸਕੂਲ 'ਚ ਲੱਗੇ ਇੱਕ ਨੀਂਹ ਪੱਥਰ ਤੋਂ ਪਤਾ ਲਗਦਾ ਹੈ ਕਿ ਇਹ ਸੰਨ 1958 'ਚ ਬਣਿਆ ਸੀ ਅਤੇ ਇਸ ਦੇ ਤਿੰਨ ਕਮਰਿਆਂ ਦੀਆਂ ਛੱਤਾਂ ਦੀ ਹਾਲਤ ਹੁਣ ਬਹੁਤ ਹੀ ਮਾੜੀ ਹੋਈ ਪਈ ਹੈ। ਹਾਲ ਇਹ ਹੈ ਕਿ ਇਨ੍ਹਾਂ ਕਮਰਿਆਂ ਦੀ ਵਰਤੋਂ ਇਸ ਵੇਲੇ ਨਹੀਂ ਕੀਤੀ ਜਾ ਰਹੀ ਹੈ। ਤਿੰਨਾਂ ਕਮਰਿਆਂ ਦੀਆਂ ਛੱਤਾਂ ਬਦਲਣ, ਛੱਤਾਂ ਉੱਚੀਆਂ ਕਰਨ, ਵਰਾਂਡੇ ਦਾ ਪਹਿਲਾ ਲੈਂਟਰ ਢਾਹ ਕੇ ਉੱਚਾ ਕਰਨ ਅਤੇ ਨਵੀਂ ਫਰਸ਼ਬੰਦੀ ਲਈ ਪੰਜ ਲੱਖ ਰੁਪਏ ਤੋਂ ਵੱਖ ਰਕਮ ਖਰਚਣ ਦਾ ਅਨੁਮਾਨ ਸੀ। ਜਿਸ ਲਈ ਪ੍ਰਵਾਸੀ ਭਾਰਤੀਆਂ ਨੇ ਖੁਦ ਉਗਰਾਹੀ ਕਰਕੇ ਤਿੰਨ ਲੱਖ ਰਪੁਏ ਇੱਕਠੇ ਕੀਤੇ ਸਨ। ਮੈਂਬਰ ਪਾਰਲੀਮੈਂਟ ਸੰਤੋਖ ਸਿੰਘ ਚੌਧਰੀ ਵਲੋਂ ਅਪ੍ਰੈਲ 2015 ਦੌਰਾਨ ਐਲਾਨੇ ਤਿੰਨ ਲੱਖ ਰੁਪਏ ਦੀ ਵੀ ਉਡੀਕ ਕੀਤੀ ਜਾ ਰਹੀ ਸੀ। ਜਿਸ ਕਾਰਨ ਛੱਤਾਂ ਬਦਲਣ ਦਾ ਕੰਮ ਵਕਤੀ ਤੌਰ 'ਤੇ ਰੋਕਿਆ ਹੋਇਆ ਸੀ। ਹੁਣ ਤਿੰਨ ਲੱਖ ਰੁਪਏ ਦੀ ਇਹ ਗਰਾਂਟ ਪੰਚਾਇਤ ਦੇ ਬੈਂਕ ਖਾਤੇ 'ਚ ਆ ਗਈ ਹੈ।
ਅਜਿਹੀ ਸਥਿਤੀ 'ਚ ਪਿੰਡ ਦੇ ਮੋਹਤਬਰਾਂ ਦੀ ਇੱਕ ਮੀਟਿੰਗ ਕੀਤੀ ਗਈ। ਜਿਸ 'ਚ ਸਰਕਾਰੀ ਗਰਾਂਟ ਖਰਚਣ ਲਈ ਸ਼ਰਤਾਂ ਦੱਸ ਦਿੱਤੀਆਂ ਗਈਆ। ਜੇ ਇਮਾਰਤ ਸਕੂਲ ਦੇ ਸਾਹਮਣੇ ਵਾਲੇ ਪਾਸੇ ਮੁੜ ਤੋਂ ਨਵੇਂ ਸਥਾਨ 'ਤੇ ਬਣਾਈ ਜਾਂਦੀ ਹੈ ਤਾਂ ਕਰੀਬ 13 ਲੱਖ ਰੁਪਏ ਖਰਚ ਆਉਣਗੇ। ਜਿਸ 'ਚ ਗਰਾਂਟ ਵਾਲੇ ਤਿੰਨ ਲੱਖ ਅਤੇ ਤਿੰਨ ਲੱਖ ਰੁਪਏ ਨਗਦ ਕੋਲ ਹਨ। ਬਾਕੀ 7 ਲੱਖ ਰੁਪਏ ਦੀ ਹੋਰ ਜਰੂਰਤ ਪਵੇਗੀ। ਜੇ ਨਵੇਂ ਸਥਾਨ 'ਤੇ 13 ਲੱਖ ਰੁਪਏ ਨਾਲ ਇਮਾਰਤ ਬਣਦੀ ਹੈ ਤਾਂ ਕਮਰੇ ਵੀ ਚਾਰ ਬਣ ਜਾਣੇ ਹਨ ਕਿਉਂਕਿ ਪਹਿਲੇ ਕਮਰੇ ਵੱਡੇ ਸਾਈਜ਼ ਦੇ ਹਨ।
ਜੇ ਪੁਰਾਣੇ ਕਮਰਿਆਂ ਦੀਆਂ ਛੱਤਾਂ ਬਦਲੀਆਂ ਜਾਂਦੀਆਂ ਹਨ ਤਾਂ ਗਰਾਂਟ ਨਾਲ ਬਣਨ ਵਾਲਾ ਕਮਰਾ ਨਵੀਂਆਂ ਇੱਟਾਂ ਨਾਲ ਹੀ ਬਣਾਉਣਾ ਪਵੇਗਾ ਅਤੇ ਬਾਕੀ ਦੋ ਕਮਰਿਆਂ ਦੀਆਂ ਛੱਤਾਂ ਬਦਲੀਆਂ ਜਾ ਸਕਦੀਆਂ ਹਨ ਅਤੇ ਵਰਾਡਾਂ ਵੀ ਉੱਚਾ ਹੋ ਸਕੇਗਾ।
ਇਕੱਠੇ ਹੋਏ ਪਿੰਡ ਵਾਸੀਆਂ ਨੇ ਛੱਤਾਂ ਬਦਲਣ ਵਾਲੇ ਕੰਮ ਨੂੰ ਹੀ ਤਰਜ਼ੀਹ ਦਿੱਤੀ ਹੈ। ਜੇ ਕੋਈ ਦਾਨੀ ਸੱਜਣ ਨਵੀਂ ਇਮਾਰਤ ਬਾਰੇ ਯੋਗਦਾਨ ਪਾ ਸਕਦੇ ਹੋਣ ਤਾਂ ਉਹ ਸਕੂਲ ਨਾਲ ਸੰਪਰਕ ਕਰ ਸਕਦੇ ਹਨ। ਕਮਰਾ ਢਾਉਣ ਦਾ ਕੰਮ ਦੋ ਤਿੰਨ ਦਿਨ ਬਾਅਦ ਆਰੰਭ ਹੋ ਜਾਣਾ ਹੈ। ਇਸ ਤਰ੍ਹਾਂ ਕੰਮ ਦੀ ਸ਼ੁਰੂਆਤ ਹੋ ਜਾਣੀ ਹੈ ਅਤੇ ਆਪ ਸਭਨਾ ਦੇ ਸਹਿਯੋਗ ਨਾਲ ਪਿੰਡ ਦਾ ਸਕੂਲ ਇਲਾਕੇ 'ਚ ਆਪਣਾ ਨਾਮ ਕੱਢ ਸਕਦਾ ਹੈ। ਜੇ ਕਿਸੇ ਦਾ ਕੋਈ ਹੋਰ ਸੁਝਾਓ ਵੀ ਹੋਵੇ ਤਾਂ ਉਹ ਵੀ ਸਕੂਲ ਨਾਲ ਸੰਪਰਕ ਕਰ ਸਕਦਾ ਹੈ।