ਪਿੰਡ ਮੁਠੱਡਾ ਕਲਾਂ ਦੀ ਪੰਚਾਇਤ ਦੀ ਮਾਲਕੀ ਵਾਲੀ ਵਾਹੀਯੋਗ ਜ਼ਮੀਨ ਦਾ ਕਬਜ਼ਾ ਲੈਣ ਉਪੰਰਤ ਅੱਜ ਚਕੋਤੇਦਾਰ ਨੇ ਕਣਕ ਵੱਢ ਲਈ। ਇਸ ਜ਼ਮੀਨ ਦਾ ਕਬਜਾ ਪੰਚਾਇਤ ਨੇ ਲੰਘੇ ਛੇ ਮਹੀਨੇ ਪਹਿਲਾ ਲਿਆ ਸੀ ਅਤੇ ਪਿਛਲੇ ਸਾਲ ਕਰੀਬ 1 ਮਹੀਨਾ ਧਰਨਾ ਲਗਾਉਣ ਉਪਰੰਤ ਹੀ ਕਣਕ ਦੀ ਕਟਾਈ ਹੋ ਸਕੀ ਸੀ। ਕਣਕ ਦੀ ਕਟਾਈ ਹੋਣ ਵੇਲੇ ਲੋਕਾਂ ਦੇ ਚਿਹਰਿਆਂ ’ਤੇ ਆਈ ਖੁਸ਼ੀ ਨੂੰ ਪੜ੍ਹਿਆ ਜਾ ਸਕਦਾ ਸੀ। ਇਸ ਮੌਕੇ ਲੋਕ ਆਪਣੀ ਖੁਸ਼ੀ ਇੱਕ ਦੂਜੇ ਨਾਲ ਸਾਂਝੀ ਕਰ ਰਹੇ ਸਨ। ਕਰੀਬ ਛੇ ਮਹੀਨੇ ਪਹਿਲਾ ਕਬਜਾ ਲੈਣ ਉਪੰਰਤ ਪੰਚਾਇਤ ਨੇ ਬੋਲੀ ਕੀਤੀ, ਜਿਸ ਉਪਰੰਤ ਸੁਰਿੰਦਰ ਪਾਲ ਨੇ ਪਿੰਡ ਵਾਸੀਆਂ ਦੀ ਮਦਦ ਨਾਲ ਕਣਕ ਦੀ ਬਿਜਾਈ ਕੀਤੀ ਸੀ, ਜਿਸ ਨੂੰ ਹੁਣ ਵੱਢ ਲਿਆ ਗਿਆ। ਇਸ ਮੌਕੇ ਪਿੰਡ ਦੇ ਸਰਪੰਚ ਕਾਂਤੀ ਮੋਹਣ ਸਮੇਤ ਵੱਡੀ ਗਿਣਤੀ ’ਚ ਪਿੰਡ ਵਾਸੀ ਹਾਜ਼ਰ ਸਨ, ਜਿਨ੍ਹਾਂ ’ਚ ਅੌਰਤਾਂ ਵੀ ਸ਼ਾਮਲ ਸਨ। ਇਸ ਮੌਕੇ ਸਰਪੰਚ ਨੇ ਕਿਹਾ ਕਿ ਇਸ ਜ਼ਮੀਨ ਤੋਂ ਕਣਕ ਦੀ ਕਟਾਈ ਕਰਨੀ ਲੋਕਾਂ ਦੇ ਸੰਘਰਸ਼ ਦੀ ਜਿੱਤ ਹੈ, ਜਿਸ ਨੂੰ ਲੋਕਾਂ ਦੇ ਏਕੇ ਨੇ ਹੀ ਸੰਭਵ ਬਣਾਇਆ ਹੈ।
